keya shatranj ka zikr qur'aan me kiya gaya hai? | shatranj aayatullah khaamenaei ki nazar me

sawaal az : mohtaram janaab shantu sb / Lucknow

Janab Assalam o alykum...

Aaj kal Ayatullah Khamenie Ke liae Jo Unhone Chess ko khelna Halaal qaraar diya hai agar hum Juwaa na khelen.

Is par thodi Roshni dalen...

Kya Chess khelna Quran me haram karar diya hai ... ?

Mujhe unke Mukhalif jo log hain unko jawaab dena hai ...

Jawaab :

باسمه تعالى

عليكم السلام و رحمةالله و بركاته

lafz shatranj ka zikr qur'aan me kahin nahi hai, surah baqarah aayat 219 aur surah maa'aedaah aayat 90 me "maisir = مَیسِر" (yaani juaa = qemaar) ka zikr hai, shatranj maisir (juaa = qemaar) me shaamil hai is ka aek misdaaq hai, is liae haraam hai

albatta baaz rewaayaat wa tafsir ke motaabiq maisir se moraad ba taur-e-mustaqil shatranj hai

jin maraaje jaiyse Rahbar-e-inqelaab Aayatullah Khaamenaei ne kuchh shaaraa'aet ke saath shatranj khelne ki aejaazat di hai to is ka matlab hargiz ye nahi hai ke haraam-e-khoda halaal ho gaya, haraam-e-khoda qeyaamat tak haraam hi rahe ga, khoda ka hukm nahi badalta

lekin kabhi mauzu (kisi chiz ki asl, maahiyat aur haqiqat) ke badalne se hukm bhi badal jaata hai

Misaal :

angur khaana halaal hai lekin angur sharaab me tabdil ho jaa'ae to najis wa haraam ho jaa'ae ga aur yahi sharaab sirka me tabdil ho jaa'ae to halaal ho jaa'ae gi

Dusri misaal :

kutta jab tak kutta hai najis hai lekin yahi kutta namak ki kaan me gir kar namak me tabdil ho jaa'ae to najis nahi hai paak ho gaya

aap ne molaaheza farmaaya ke mauzu ke badal jaane se hukm bhi badal gaya

haraam ya halaal-e-khoda nahi badla wo apni jagah par baaqi hai,

angur halaal hai taa qeyaamat halaal rahe ga, sharaab pina haraam hai taa qeyaamat haraam rahe gi, sirka halaal hai taa qeyaamat halaal rahe ga ... hukm-e-khoda wahi hai ous me koei tabdili nahi huei lekin mauzu badal gaya to hukm bhi badal gaya

shatranj bhi isi tarah hai, shatranj khelna haraam hai is liae ke juaa ke auzaar wa aalaat me shaamil hai, baa alfaaz-e-digar juaa wa qemaar hai is liae haraam hai

khud ba khud (apne aap) haraam nahi hai balke juaa hone ki wajah se haraam hai, jo khud-ba-khud haraam huaa wo juaa hai

agar yahi shatranj juae ke auzaar wa aalaat me se khaarij ho jaa'ae is ka shumaar juaa wa qemaar me na ho to mauzu badal gaya, jab mauzu badal gaya yaani juaa nahi raha to hukm bhi badal jaa'ae ga

shatranj haraam thi lekin mauzu badalne se khelna halaal ho gaya, dar haqiqat shatranj ki haqiqat wa maahiyat badli hai hukm nahi badla hai, hukm-e-khoda apni jagah par baaqi hai

inhi baaton ke peshe nazar Rahbar-e-inqelaab Aayatullaah Khaamenaei ne farmaaya :

agar ourf ya mokallaf ki nazar me shatranj, juae ke auzaar se khaarij ho gaei aur haar jit ki shart ke be'ghair, tafrih wa zehni mashq wa warzish ke taur par kheli jaa'ae to haraj nahi hai

(is liae ke is surat me juaa nahi hai mauzu ke badal jaane se hukm bhi badal gaya)

Note :

1. baaz foqaha qaa'ael hain ke shatranj khud-ba-khud ba'taur-e-mustaqil haraam hai, juaa (qemaar) hone ki wajah se haraam nahi hai ...

   
   

   jin foqaha ki ye nazar hai wo har haalat me shatranj khelne ko haraam kahte hain




2. ye eilmi wa ijtehaadi bahs hai is ko aur is tarah ke masaa'ael ko samajhne ke liae Hauzae eilmiya Najaf-e-ashraf ya Qum-al-moqaddasa me kam az kam 10 saal dars padhna chaahiae

   lehaaza aam momenin-e-geraami ka wazifa bas aetna hai ke apne marja ke mas'ale ke motaabiq amal karen



3. mazid tafsilaat ke liae recommend kiae ga'ae jawaab ko padh len


• shatranj khelne ka keya hukm hai ? is ke noqsaanaat | juaa ke aalaat se moraad | eijaad karne waala

والسلام

Syed shamshad Ali Katokhari

khaadim-e-edaara-e-darul itrat azim Aabaad / patna shoba-e-sawaalaat qum / iran

۔22 / صفر / 1441ھ.ق

Subscribe us on youtube

---

Recommended

patte ya computer se taash khelne ka hukm | juae ke auzaar ki tashkhis kaise karen ?

shatranj | luddo | taash| mobile | computer se khelne ka hukm